أول ثنعش هان

ثاني ثنعش هان

استراتيجيات لتكسب الأرض

1. بدّل العمدان بخشب مخشبن

لخبط ترتيبات العدو, اتدخل بطرق شغلهم, غير القوانين الي بعتمدوا عليها, و اشتغل عكس الطريقة الي اتدربوا فيها. بهالطريقة بتسحب العمود الشايل المجموعة, الرابط الي بخلي أي مجموعة من الناس فعالين بتشكيلتهم

الصين أيام السلالات الستة

في سنة 383 الامبراطور فو جيان حاكم كِن, كاين شخصيا قايد 5000 من أقوى فرسان ليهاجم زي شي جنرال جِن. بس اكتشف إنه قوات جِن أكبر مما كان يتوقع, أمر جنوده يصفوا بطريقة دفاعية على ضفة النهر. قوات جِن عملوا نفس السولافة عالسايد الثاني. و الطرفين ما كانوش ناوين يقطعوا النهر لأنه معروف الجيش لما يقطع النهر بكون طقيعة. جنرال شي بعث رسالة “سيدي, جيشك خش عأراضينا و عاملين دحشة عند النهر. هيك منظل صافنين بدون ما حدا يقدر بهجم. انت بدك تحارب؟ لعاد خلي جنودك ينسحبوا لمسافة آمنة عشان نقطع النهر و نتحارب و نخلص من اخت هالسولافة

الامبراطور وافق على الطلب. بس مستشارينه اعترضوا, الامبراطر فو جيان قال إنه بده يلف بجيشه بعد ما نص الجيش الثاني يقطع. بس جنرال شي كان أحدق منه و بعث جنود متخفيين. لما الامبراطور أمر الجنود ينسحبوا, الجواسيس عملوا قلق و طلعوا إشاعة إنه منسحبين مهزومين و الثانيين لاحقينهم يخلصوا عليهم. الانسحاب قلب فليلة و بدل الترتيب العسكري صارت طعة و قايمة, الامبراطور و جنرالاته لحقوا الجنود بالأسواط بس عالفاضي. جيش جِن بسرعة قطع النهر و لحّق قوات كِن و مردغوهم. الامبراطور انصاب و يا دوب هرب. بعدين انمسك و أعدموه بعد أكم اسبوع

2. أشّر على التوت بس طعّم عالخروب

لتبهدل, تتحكم أو تحذر ناس واصلين بتقدرش تيجي فيهم عينك عينك; شفر حركاتك و سمع الكلام تسميع بدون ذكر الاسماء, الي قاصدهم مش رح يقدروا يردوا بدون ما يلبسوا التهمة

الصين أيام سلالة هان

بس صار غاوزو امبراطور, عز كثير من التابعين اله. مرة كان بكزدر و مر ببلكونة القصر و لاحظ أكم وزير بتنسنسوا و بتهامسوا. “عن شو بسولفوا؟” سأل مستشاره تشانج ليانج “جلالتك بتدريش؟ قاعدين برتبوا لانقلاب”. “إيه! بس الأمن رجع للامبراطورية, لويش بدهم يثوروا؟”. رد المستشار: “لما كنت من العوام و نجحت, كانوا العوام الي ساعدوك توصل هون و تصير ابن السماء. بس الي عزيتهم كلهم صحابك القدام. هظول القواريط الي بالجيش حسبوها و شافوا إنهم فش أراضي تكفي الكل, في منهم خايف ما يصحله اشي و عشان هيك بخخطوا لثورة”. “شو اسوي؟” سأل الامبراطور. “مين أكثر واحد من تابعينك مش طايقهم؟”. “يونج تشي, انا وياه منكره بعض عالمسبحة” رد الامبراطور. “لعاد أسرع و عزه بسولافة قبل أي حدا, و ورجي الكل كيف عزيت الناس. بس يشوفوا يونج تشي أخذ حصته كلهم غير يتطمنوا إنه بطلعلهم سولافة” رد تشيانج

الامبراطور وافق و عمل عزومة على شرف يونج تشي و عزه بألقاب و أراضي. لما روحوا الوزراء و المستشارين قالوا “إذا حتى يونج تشي صار و تصور, فش داعي نخاف إنه ما يطلعلنا اشي

3. اعمل حالك مهسهس بس مش تصير متخلف عالآخر

اتخبى ورا قناع واحد مشطوب, أو سوكرجي أو مهسهس عشان تربك الناس و ما يحزروا لنيتك و طموحك. اجذب العدو ليقلل من قيمتك, و بس يوكل مقلب بحاله, اشمطه

الصين أيام سلالة سوي

بآخر أكم سنة لامبراطور يانج من سلالة سوي, طلعت غناية عن سقوط سلالته و جية واحد اسمه لي ليصير امبراطور. الاغنية انشهرت بين الناس عشنهم مش طايقين حكمه الخرائي. الامبراطور صار يتلمس و صدق النبوءة. و بلش حملة ليمسك و يعدم أي واحد مهم اسم عيلته لي. قتل مجموعة من المستشارين و مسؤولين و كل عيلهم. مسؤول صغير اسمه لي يوان كان بشتغل رئيس مخفر للقرى و أجاه أمر يروح عالقصر. لي يوان أخر الزيارة بحجة إنه صحته مش ولا بد. بنت اخته (أو اخوه) كانت تشتغل خادمة بالقصر و بس سألها الامبراطور وينه, قالت إنه مريض. الامبراطور قال “شكله حاب يموت؟”. لما سمع لي يوان سمع الخبر تأكد إنه إذا راح عالقصر مش رح يرجع. فعمل حاله سوكرجي مهسهس. لما المخبرين شافوه و وصلوا حالته للامبراطور, قال إنه واحد مجنون مستحيل يطبق النبوءة و بطل يشك فيه. بعد سنتين امبراطور سوي عمل لي مسؤول عجيش ليحمي الامبراطورية من هجمات بربرية. لي قاتل بشجاعة و جنوده احترموه, و سحبها عالعاصمة, و صار المؤسس لسلالة تانج الخرافية, محققا النبوءة

4. طلّع العدو عالسطح و خد السلم معاك اقسمبلاه تاني

بالطعوم و الخداع اسحب عدوك لأرضية وذفة. بعدين اقطع اتصالاته و قدرته عالانسحاب. عشان ينقذ حاله هسا لازم يقاتل قواتك و الطبيعة كمان

الصين أيام سلالة هان

بعد هزيمة مملكة الثوار وي, جنرال هان المشهور هان زِن انبعث ليسحق مملكتين ثانيات ثارن, كي و تشو. الجنرال هان طلع باتجاه كي بس تشو بعثت جنرالها لونج تشو مع ميتين ألف جندي ليقطعوا عليه الطريق و يمنعوه يوصل كي. الجيشين قعدوا على الضفاف المتقابلة لنهر وي. الجنرال هان أمر جنوده يملوا اكثر من عشرتالاف كيس رمل و يصنعوا سد بأول النهر. ثاني صبح خش بجيشه عبر النهر و دق بالجيش الثاني, بعد بشوي عمل حاله انهزم و انسحب. جنرال لونج قال “يا زم مش دايما بقولكوا هان زِن خُز!” و هجم بجيشه ليلحقه. أطلقوا إشارة متفقين عليها سابقا و جنود هان دمروا السد و طفحت المي. بس نص جيش تشو طلع و الباقي غرقوا. الجنرال هان لف مع جيشه و كبس على جيش تشو و قتل الجنرال لونج تشو. الجنود الي ضلوا خف عقلهم و هربوا بكل جهة بس انمسكوا كلهم

5. اربط أوراق حرير على شجرة ميتة

لما تربط أوراق حرير على شجرة ميتة بتعطي انطباع إنها تمام. بالتشكيل و التمويه اعمل اشي ملوش قيمة يبين اله قيمة, أو اشي بضرش يبين خطر, أو اشي مش مفيد مفيد

الصين بأواخر أيام صقور الأرض

في السنوات الأخيرة من الممالك الثلاث, سوما يان بالخاوة قعد على عرش وي, و صار ملك, و غير اسم المملكة من وي لجِن. وصلت الأخبار لملك وو الي عرف انه مملكته غير تكون الهدف الجاي لسوما. من كثر ما انقهر طق و مات. سن هاو ورث مملكة وو و فورا عمل السبعة و ذمتها و طنش مسؤوليته. بعد أكم سنة ملك وو صار يتلمس و يشك بالكل, و قتل جنرالات و مستشارين عفق, فبطل حدا يطيقه. بس وصل الخبر لسوما, أمر بهجمة بحرية بقيادة الجنرال وانج تشون. ملك وو ما كانش عارف إنه على وشك يتعبط هجمة بحرية. كان مجتمع مع مستشارينه و واحد منهم اقترح يعملوا حاجز من ساق البامبو في النهر عشان يمنع الاسطول يوصل عاصمة جيان ييه. الملك وافق و انربطن السيقان تحت سطح المي. لما القائد وانج سمع عن الحاجز فكع من الظحك. و أمر جنوده يعملوا قوارب ضخمة من الخشب و عليها يعملوا جنود قش عليهم دروع و حاملين أسلحة. القش اندهن بزيت و انعملت آلية تولع النار بس تصل القوارب الحاجز. القوارب ولعت و حرقت الحاجز و ضلت بوجهها لعاصمة وو. شكل القوارب و الناس مولعين فوقها خففت خزق جنود وو و هربوا. سوما احتل وو و عمل سلالة جِن الي ما طولتش

6. كُل البلد (كون ضيف و اقلب مضيف

دمر العدو من داخله, تنسنس لقواعده تحت غطاء التعاون, الاستسلام أو السلام. هيك بتعرف شو نقطة ضعفه و أول ما يرخي بيضاته اقطع خلفته

خريفية يابانية

بالزمانات كان في معلم كيندو بده يمتحن أحسن ثلاث طلاب عنده. أخذهم عمعبد قديم بالجبال و قال لكل واحد “انت درست على ايدي كثير و هسا بدي أشوف اذا تعبي راح فشوش ولا لأ. في بالمعبد امتحان, انجح و بضمنلك تتخرج

جوا المعبد الي إضاءته زخخرا طلب من اربعة ساموراي يلبدوا مع قنوات و يضربوا أي واحد بدخل. الطالب الأول دخل و قبل ما يتعود على الإضاءة نهنهوه. “آسف بس انت رسبت” قال المعلم

ثاني طالب دخل و حس عالساموراي, اجا حروث عن ضرباتهم و كتلهم, طلع مزهزه راح المعلم بعصه “آسف بس انت كمان رسبت

بعدين دور الطالب الأخير, المعلم قال له كيت كيت كيت, الطالب رد “بس يا معلمي الكبير, البروتوكول بقتضي إنه لما يندخل المعبد, المعلم دايما بسبق التلميذ, تفضل لو سمحت عشان ألحقك”, المعلم رد “يا عرص, علمتك كل اشي بقدر أعلمك اياه

استراتيجيات لما تكون ميكل هوا

1. استراتيجية المزز

ابعث مزز لتخربط أمور العدو. هالاستراتيجية بتشتغل على ثلاث طبقات. أولا الزعيم برخص و بصير يطنش شغله و يقظته بتصير مش ولا بد. ثانيا الشباب كلها كمان بترخص و بتقلب على بعض فبصير في تتش و معنوياتهم بتخف. ثالثا النسوان من الحسد و الغيرة بصيروا يحفروا لبعض و بتكبر السولافة

الصين أيام سلالة هان

في 199 قبل الميلاد, جاوزو امبراطور هان شخصيا قاد جيشه ضد جيش زيونجنو الي طب عليهم. الامبراطور ما كانش حدق زي القبائل و اكل مقلب و خسر بلاوي ناس. هو و الي صفا معاه من الجيش رجعوا و قعدوا بمدينة بينجتشينج بس ابو ثلاثمية ألف فارس حاوطوهم. الامبراطور انحشك لسبع أيام بدون أي وسيلة يجيب امدادات أو مساعدات. الامبراطور حس إنه ما بقدر غير إنه يستسلم بس مستشاره, تشين بينج, طلع باستراتيجية. تشين طلب رسمة لأميرة مز صينية و بعثها بالسر لزوجة زعيم زيونجنو و رسالة “امبراطوري بده يستسلم لزوجك و عشان يزبط أموره غير يبعثله مزة من أمزز مزز الصين هدية”. لما شافت الرسالة انجنت, و خافت إنه المزة غير تعمي قمار زوجها, و اقنعته يفك الحصار و يروح. ثاني يوم الامبراطور صحي و فش حدا محاوطه, سحب حاله و رجع عالعاصمة بسلامة

2. استراتيجية البواب المفتحة

لما يكون العدو أقوى و جنوده أكثر و حالته أحسن, و انت بجوز تتحشلك بأي لحظة. زت كل استعدادك العسكري و اعمل كأنه فش اشي. إذا ما كان عارف وضعك غير يشك بالحركة و ما يقتنعش إنه لازم يهجم

الصين أيام صقور الأرض

في 149 قبل الميلاد, كونج مينج الاستراتيجي المشهور من شو, هجم على مقاطعة من وي و بعث كتيبة استطلاعية ليستكشفوا الوضع. سوما الأول كان القائد لجيش وي و كمان بعث خمسين ألف جندي ليستكشفوا. الطليعتين التقوا و تهاوشوا بس قوات وي كانت أقوى و فازت. طليعة تشو أسرعت لقلب جيش كونج مينج, و بس الجنود شافوا الخوف بوجوه الراجعين فكروا إنه العدو جاييهم و هربوا. كونج مينج و أكم حارس شخصي هربوا لمدينة يانج بينج و كان جيش وي على وشك يوصل. بما إنه العدو كان ضخم و ما بقدر ينسحب ولا يتحمل حصار, كونج مينج عمل استراتيجية شهرته بالصين. سحب جنوده و نزل الأعلام و فتح أبواب الحصن كلها عالآخر. لما وصل سوما الأول و شاف أكم ختيار بكنسوا الأرض, و كان كونج مينج قاعد على واحد من الأبراج مبتسم و بعزف على العود. سوما الأول قال لمستشارينه “الزلمة مبسوط لدرجة مش مريحة. أكيد عامل خطة ليدخلنا بمصيبة”. صفنوا فيه و الدق عالعود وصل صوته الهم و صاروا يتلمسوا. الموقف الغريب شكك سوما الأول و خاف إنه يوكل فخ مرتب. لف بجيشه و انسحب. بس راح الجيش كونج مينج و الأكم جندي الي معاه شلفوا بالاتجاه المعاكس و وصلوا بسلام للعاصمة

3. استراتيجية زرع بذور الفتنة

خفف قدرة العدو على القتال بزرع بذور الفتنة بينه وبين صحابه و حلفاؤه و زملاؤه و قاداته و جنوده و شعبه. بس ينشغل بحل المشاكل قدرته يهجم أو يدافع بتتزعزع

الصين أيام السلالات الست

في نهاية سلالة وي, الامبراطور تاي وو قاد جيش من مية ألف جندي ضد جنرال سونج, زانج زي. الامبراطور مع جيشه الجرار لحق زانج و حشكه بمدينة يو. المدينة كانت محصنة و الامبراطور كان بده يحاصرها ليجوع الناس حتى يستسلموا. كان الزلمة واثق من موقفه و بعث جرة نبيذ لبوابة المدينة مع رسالة ليطالب بتقليد تبديل أنبذة قبل ما يبلش الحصار. زانج زي عرف إنه لازم يقاتل بحرب حاسمة عالسريع, أو بخسر, و استغل هالفرصة. أمر جنوده يستلموا الجرة و بعث بدالها جرة مسكرة للامبراطور. لما انصبت كاسة للامبراطور اكتشفوا إنها شخاخ مش نبيذ. الامبراطور انحرق راسه و انخزى قدام جنوده, و من عصبيته أمر بهجمة على الحصن مباشرة. الجنود المحصنين كانوا مستعدين و جثث الجنود الهاجمين تكوموا تقريبا وصلوا طول التحصينات. من غضبه و تسرعه الامبراطور خسر نص جنوده

4. استراتيجية تجرح حالك

لما تتظاهر إنك انجرحت بتوصل فكرتين. أولا العدو برتاح لأنه بطل يعتبرك خطر مباشر, ثانيا ممكن تعمل حالك صحبة معاه لأنه في عدو مشترك بينكم هو الي جرحك

اليابان في فترة إيدو

في حقبة التوكوجاوا, كاي جوزو, جاسوس سابق, صار موضع شك و كان بخطر اغتيال. و الزلمة الي انبعث ليقتله كان صاحبه بالزمانات, و اسمه تونبي. تونبي ما كانش بده بقتل زلمته, فاتفق هو و جوزو ليعملوا خطة كلاسيكية كالآتي. تونبي أخذ جوزو كأسير و وداه للشوجون. جوزو ترجى الشوجون إنه يسمحله بالانتحار بطريقة الهاراكيري ليحافظ على كرامته. الشوجو عجبته السولافة و كان بده يشوف شجاعة الجاسوس المشهور بالموت. و سمحله يعملها. جوزو انعطى تونتو (خنجر) و طعن بطنه و حرك الخنجر لجنب, مصارينه طلعن و وقع. الحراس سحبوا الجثة و زتوها برة. بعد بفترة قصيرة هرب و سبح من المقاطعة. لأنه كان عارف إنه سمعته غير تسمحله ينعطى شرف الهاريكيري, جوزو ربط جثة ثعلب ميت على معدته, و بس طلعت مصارين الثعلب بينت إنها مصارين بني آدم

5. تكتيك تجميع التكاتيك (قول تكتك

بالأمور المهمة الواحد لازم يجمع استرتيجيات و يستخدمها مع بعض. كل الخطط بشكلوا خطة كبيرة. إذا واحدة من مجموعة الخطط فشلت, بكون في غيرها يرقع مكانها

الصين أيام ما كانت الحرب سحاسيح

في 284 قبل الميلاد, مقاطعة يان هجمت و هزمت كي. قوات كي الي ضلوا بقيادة تين تان هربوا لمدينة جي مو لمواجهة أخيرة. أول اشي تيين تان خلا النسوان يطلعوا على التحصين و يطالبوا باستسلام سلمي و بنفس الوقت بعث مصاري أخذها من أغنى السكان للجنرال كي تشي. و معهم رسالة مطالب إنه النسوان و الولاد ما يصيرلهم اشي مقابل استسلام المدينة. الأمور هاي أقنعت كي تشي إنه المدينة كانت فعلا بدها تخسر و تستسلم و سمح لجنوده يريحوا. بعد هالترتيبات تيين تان حس إنه الوقت جاهز لهجمته المضادة. أول اشي أمر السكان إنهم يجمعوا طبول و قدور و بإشارة معينة يعملوا أكثر إزعاج بقدروا يعملوه. بعدين جاب قطيع و دهنهم بألوان بأشكال غريبة و علق على قرونهم سكاكين و مناجل, و على ذيلهم علق شعلات. قبل الفجر ثلاث أشياء صاروا بنفس الوقت, السكان عملوا ضجة اخت شلن, الشعلات ولعت و فلتوا القطيع لبرا الحصن. الحيوانات انجنت و أسرعت باتجاه مخيم ين و قتلوا الجنود الي ظلوا عصفنتهم. و الخيم هبت فيها النار. بعديها جنود كي هجموا على الجنود المرتبكين و المفصومين. تيين تي غلب جيش يان و راح أخذ كمان سبع مدن

6. إذا خريت و خريت, الهريبة ثلثين المراجل

اذا وضح من حالتك الحالية إنه أكيد غير توكلها, انسحب لتزبط أمورك

الصين أيام سلالة مينج

هوي تي, امبراطور مينج, تخلص من كل عمامه ما عدا واحد كان عامل حاله مجنون, نفسه أمير يان, بسنة 1403 قاد جيش ضخم ضد العاصمة ليستولي على العرش. المدينة تحاصرت و الامبراطور فكر ينتحر, بس واحد من المستشارين المخصيين منعه و حكاله إنه جده, الامبراطور هونج وو, ترك صندوق بعهدته و أمره إنه إذا صارت مصيبة تهدد السلالة, يخلي الامبراطور يفتح الصندوق

خنفتحه” قال الامبراطور “تنشوف شو أبوي كان هيعمل لو كان مكاني”. بس فتحه كان في أواعي راهب و شهادة و شفرة حلاقة و عشر قطع فضة. الامبراطور فهم و بسرعة هو و مجموعة من مساعدينه هربوا من طريق سري لمعبد بوذي. هناك حلق شعراته و لبس الروب. و راح لمدينة سيتشوان و عاش بمعبد نائي بدون ما حدا يعرف مين هو

القصر انحرق أثناء الهجمة و الكل فكروا إنه الامبراطور انحرق. بعد اربعين سنة بحكم الامبراطور يينج تسنج (الرابع بعد هوي تي) راهب بوذي ختيار راح على القصر و ادعى إنه الامبراطور هوي تي. اكتشفوا إنه تشذاب بس الإشاعة طلعت إنه لساته عايش, عشان يخلصوا من الإشاعة فتحوا تحقيق رسمي و فعلا اكتشفوا إنه هوي تي عايش كراهب بوذي. الامبراطور القديم انعزم على العاصمة و انعملّه استقبال فاخر و عاش آخر أيامه ضيف بالقصر, بس كانوا متبعينله عشان ما يعمل اشي

أول ثنعش هان

ثالث ثنعش هان

استراتيجيات للهجوم

1. اذرب العشب لتجفّل الحنش

لما تكون ابتعرفش خطة العدو اهجم عليه مباشرة, بس نتفة, و راقب ردة فعله. تصرفاته بتفضح عرض استراتيجيته

الصين أيام سلالة سونج

كان يا ما كان في مقاطعة جيان-زو, كان في زلمة ظاعتله سولافة محرزة. المسؤول للمنطقة, تشين شو-كو كان المحقق. استجوب اكم زلمة بس ما حداش قرّ. راح نصب فخ للناس الي شاك فيهم. “بعرف عن معبد الجرس فيه ليه طاقة روحية كبيرة و بتقدر تميز الحرامي من الصادق. بما إنه تحقيقي مهوش نافع, بدي استعين بطاقته الرهيبة لأحل القظية” و جاب الجرس و حطه بغرفة ورانية مبين عالناس, و جاب المتهمين و شرحلهم إنه الصادق لما يلمس الجرس ما بصير اشي, بس اذا حرامي لمسه غير يرن. و ولع أكم بخورة و أعطاها أكم ركعة و ربط برادي ليغطوه. قبل هيك كان طالب من مساعده يدهن الجرس بحبر بعد ما يتسكروا البرادي. كل متهم انطلب منه يخش و يحط ايده عالجرس. بعدين طلب منهم يورجوه ايديهم, كلهم كانت ايديهم مشحبرة إلا واحد, و اعترف إنه الحرامي و ما صابش الجرس بلاش ما يرن

2. اسرق الجثة لتجيب الروح

خذلك مؤسسة, تكنولوجيا, أو وسيلة كاينة منسية أو مطنشة و استخدمها للي بدك إياه. يعني ارجع احيي اشي من الماضي بس تعطيه هدف حديث أو ارجع فسر سوالف قديمة عشان ترجعهم للحياة

الصين أيام سلالة هان

لما الامبراطور هويدي مات في 188 قبل الميلاد, ما تركش وراه ولاد. أمه, الامبراطورة لو, جابت قاروط قبل أكم سنة من موته و خلت كنتها تمثل إنه ابنها. و عشان تخبي الدليل أعدمت أمه الحقيقية. بس مات الامبراطور خلت الولد ولي العهد و هي الامبراطورة عبيل ما يكبر, بعد سنتين الولد عرف شو صار و انسمع و هو بقول “بس اصير امبراطور بعرف شو اعمل”. بس الكلام وصل للامبراطورة خلتهم يقتلوه و جابت قاروط بداله. و لمدة 8 سنين حكمت الامبراطورية و ستة قواريط كانوا يوصلوا العرش و بعدين يموتوا بمرض غامض. (العبرة خلصت بس في كمان هالتكملة) يقال إنها ماتت بسبب لعنة من وحدة من حريم زوجها السابق كاينة بالزمانات مشوهيتها و معذبيتها. الامبراطورة لو مشهورة بالتاريخ الصيني كوحدة من “النسوان التنانين” الي صاروا امبراطورات

3. شدر الفهد تحت الجبل

عمرك ما تدق بواحد على أرضه و بين جمهوره. لازم تحاول تشدره و تبعده عن مصدر قوته

الصين أيام صقور الأرض

بسنة 199, سن تسي فرض سيطرته على الأراضي الجنوبية و حط عينه على لوجيانج, منطقة محرزة, موجودة بالشمال. بس لوجيانج كان فيها جيش مدرب و كانت محصنة مليح. كمان موقعها طقع لأنه بس بتقدر تهجم عليها من طريقين و سهل تحرسهم. مستشارين سن تسي نصحوه ما يحاول يهجم مباشرة و بلشوا بخطة ثانية. سن تسي بعث رسول معاه بلاوي هدايا لملك ليوجانج و مسج “مقاطعة شانجلياو مقززينا صرلهم أكم سنة بهجموا علينا و بسرقونا. بس احنا اضعف من إنه نرد عليهم بهجمة. فيعني لو سيادتك تساعدنا نهجم عليهم و المقاطعة بتصير حلال زلال عليك.” الزلمة كبر راسه و شطت ريالته, و طنش نصيحة مستشارينه إنه ما يهجمش و هجم على شانجلياو. بعد أكم اسبوع هجم عليها و تسن سي هجم على منطقة لوجيانج لما صفت تقريبا بدون حماية لأنه جيشها رايح مشوار. و ملك لوجيانج بدون مساعدة سن تسي ما قدرش على عاصمة شانجلياو و شلف عشان يلاقي إنه عاصمته كمان طارت. هسا سن تسي صار الي اله الأفضلية قيت تضاريس لوجيانج و الملك القديم انربطن ايديه و هرب مع جيشه

4. إذا بدك تقبض اشي دشره

الفريسة المحشورة الأغلب تعمل هجمة أخيرة محرزة. إذا بدكاش تتعبط هيك هجمة لازم تخلي لعدوك وهم بإنه لسا في اله مجال يهرب. هيك بصير جرأته على القتال مهزوزة برغبته إنه يهرب. بالأخير بس الهرب يبين إنه تشذب بكون نفسيته تعبت و بستسلم بدن هوشة

الصين أيام السلالات الستة

أيام سونج الجنوبية, الجنرال تان داو-جي هجم على الشمال بإذن من الامبراطور. و دمر و شحر مدن و قلاع. و كان آسر ابو اربعتالاف واحد. مستشارينه نصحوا إنه يعدمهم كلهم و يعمل نصب للنصر من جثثهم. تان داو-جي رد “لهسا هجمنا عالمذنبين و وقفنا مع الناس. جيش ملك حقيقي لازم يكون غانم, لويش نذبح الناس هسا؟” و أطلق سراحهم و رجعهم على دورهم. المساجين حكوا كيف أخذهم و فلتهم و كان الجنرال مليح معهم. بس سمعوا هالسولافة انبسطوا, و وين ما راح, ناس عفق راحولوه و بايعوا الامبراطور

5. زت الحجر تتجذب اليَشْب (حجر كريم أخضر

بس تنصب فخ لازم تجذب العدو بطُعُم, بالحرب الطعم بكون الوهم إنه في فرصة للفوز. في الحياة الطُعُم بكون وهم المصاري, القوة, النيا*ة

الصين لما كانت الحرب تطعيم

زعيم زي كان يجهز حاله ليهجم على وي الصغيرة.عشان يجهز هجمته بعث لملك وي هدية اربعمية حصان مستانغ و قطعة باي من اليشب الأبيض (باي كانت زي شلن مخزوق بالنص, بس متكتك و مرتب و برمز لتركيز السلطة بإيد النخبة). الملك اصطهج و مستشارينه باركوله, إلا واحد, نان-وين تسي, كان شكله مظايق. الملك سأله “هاي ولاية كبيرة مبسوطة معنا! مالك مظايق؟” المستشار رد “الواحد لازم دايما يفحص هدية بدون مقابل و دفاع بدون هجمة. اربعمية مستانغ و باي طقع هدية لما الولاية الصغيرة بتعطيها للكبيرة, بس هون العكس صار. لازم تفكر سيادتك بالموظوع” من باب ديرة البال, الملك قال لزعيم الحرس شو قال المستشار, و إنه لازم الحراس يكون متجهزين عالأخير. بعد بفترة أجا زعيم زي و معاه جيش ابن حرام. بس شاف الحدود محروسة صح و جاهزة, انسحب و قال “طلع في ناس بتفهم بوي, و كمسروا خطتي

6. لتمسك الحرامية امسك سيدهم

اذا جيش العدو قوي بس مربوط بزعيمه من باب المصاري أو الخوف, لعاد طخ الريس. إذا مات الكل بفرنقعوا أو بنضمولك. بس دير بالك, اذا الجنود عندهم ولاء فعلي للزعيم لعاد ممكن يضل يحاربوا بعد ما يموت عشان الانتقام

الصين أيامات الربيع و الخريف

بسنة 756 قبل الميلاد زعيم الثوار ين زيكي حاصر عاصمة سويانج الاستراتيجية. القائد الي كان يحميها, زانج زون, لاحظ إنه ين زيكي براقب الأمور بعيد عن مدى الرماة. و قرر إنه لو يقدر يقتله بدمر نفسية جنوده و بقدر يقلب المعركة. خطط مع أحسن رماة عنده, المرة الجاي بس يهجموا الثوار يرموهم بأغصان شجر. بس ين زيكي عرف إنه الرماة الي بدافعوا قاعدين بزتوا أغصان فكرها من القلة, و جهز لآخر هجمة بس هالمرة قرب عشان يشوف النصر بعينيه. و هو راكب على حصانه و رايح دغري ما انتبه إنه دخل على مدى الرماة و واحد نقعه بسهم بعينه اليسار موته دغري. المشهد خفف عقل جيشه لدرجة إنه كلهم هربوا و فرط الجيش

استراتيجيات لما تكون الأمور ملغوصة

1. اسرق الجمر من تحت القدر

لما تواجه عدو أقوى من إنك تخش عليه دغري لازم بالأول تضعفه و تذرب أساس قوته

اليابان في العصر الخرافي

بطل اليابان الخرافي ياماتو تاكيرو كان واحد من الأبناء الثمانية للامبراطور كييكو. بأحد الأيام انبعث ليقتل مجرم مشهور و مقلع, ولا حدا قدر يفوز عليه. ياماتو تاكيرو ما كانش ناوي يبارزه و عمل حاله مش عارفه و ضرب صحبة معاه. صاروا صحبة عالعظم و كانوا يروحوا يسبحوا كل أكم يوم. لما ياماتو ضمن إنه المجرم مأمن عليه بلش خطته. و همه رايحين يسبحوا زرّق معاه سيف خشب. و  كالعادة كانوا يتسابقوا بالسباحة حولين جزيرة صغيرة. هالمرة فتح مجال للمجرم إنه يسبقه و رجع عالشط و بدل سيفه بسيف الخشب. بعديها بس خلصوا و راحوا يلبسوا وعيتهم, تاكيرو لف عليه و بينت نيته الحقيقية. المجرم فورا راح يسحب سيفه بس السيف الخشب كان مدقر بالغمد, و هو بحاول يسحبه تاكيرو بضربة وحدة قط راسه

2. عكّر المي تتمسك السمك

قبل ما تدق بقوات العدو اعمل حركة لتربك نظره و حكمه. حركة غريبة هلسة ملسة و مش متوقعه عشان يظل على صفنته. العدو المرتبك أسهل تغلبه

الصين أيامات الخريف و الربيع

بسنة 632 قبل الميلاد جيوش جن و تشو قابلوا بعض بتشينجبو قبل معركة تسمت باسم هالمنطقة. تشو بعث رسالة لجن إنه يعملوا مبارزة بعربات اليوم الي بعده. قائد جيش جن, الدوق وين وافق. الصبحيات طلع فوق عبرج مراقبة و شاف استعدادات جنوده و قال: الكبير و الصغير يرتبوا أمورهم كالعادة. ممكن نستفيد منهم!” (مش فاهم شو يعني) و طلب من جنوده يقطعوا شجر عشان خطة طرمة. لما كانت العربة رايحة بدأ بهجمة مفاجئة عالجناح الأيمن لتشو و كبسهم باتجاه قلب الجيش, بنفس الوقت جيشه رفع رايات الاستسلام و عمل حاله بشلف, و الجنود سحبوا الشجر المقطوع وراهم. تراب و غبرة ملت الدنيا و بين إنهم فاركينها. قادة تشو فكروا إنهم انسحبوا و فورا لحقوهم. بس وصل قلب جيش تشو و تلغمطوا بالتراب و بطل مبين اشي, قوات جن كانت لابديتلهم من الطرفين و كبستهم بتكتيك الكماشة من الجهتين. النتيجة كانت هزيمة نكراء لجيش تشو و زعيمهم انحكم عليه إنه ينتحر. وين أخذ فرصة المبارزة ليشتتهم بهجمة مفاجئة, و انسحاب, و هيك دخّل قوات تشو بالحيط

3. اترك جلدك زي حشرة الزيز الذهبية

لما تكون في خطر إنك تخسر, سبيلك الوحيد هو الانسحاب لتلملم حالك, عشان هيك اخلق وهم. لما يكون العدو مركز عالوهم, اسحب حالك و خليه يفكر إنك لسا قدامه

الصين أيام صقور الأرض

تساو تساو رئيس أركان جيش وي, كان بطارد جيش و شعب شوو تحت قيادة صقور الأرض, ليو بي (عبدالرحمن) و زانج في (حِكمت). الجيش المنسحب وصل لجسر تشانج بان فوق نهر وي و جيش العدو وراهم كان بأكم ساعة بس. عالجهة الثانية من الجسر بقى في غابة. زانج في لف على ليو بي و حكاله “هالجسر هو مكان مرور ضيق من هون لأميال و بعطينا فرصة مليحة. انت خذ الجيش و الناس و امشي و انا بحاول احشك جيش وي قد ما بقدر” بعد ما جيش شوو قطع الجسر و مرق. زانج في طلب من مجموعة صغيرة من فرسانه يربطوا أغصان بأحصنتهم و يلفلوا. زانج في وقف بنص الجسر. لما وصل الجيش و شافوا زانج في واقف زي الحيط وقفوا. تساو تساو لاحظ الغبرة الطالعة و شك بفخ. بعديها زانج في صرخ فيهم صوت و تحداهم, هون تساو تسوا قال لا معلم الأمور واضحة. و لف بجيشه لينسحبوا, راح زانج في بسرعة و لحقهم لحاله عأساس يهجم, الجيش خف عقله مفكر في فخ بالموضوع و فركوها. الخدعة اعطت ليو بي و زانج في وقت كافي يلملوا حالهم و يلتقوا بتشيانلينج

4. اطبق الباب لتزقط الحرامي

اذا صحتلك فرصة تمسك العدو فلازم توخذها بأسرع وقت ممكن. اذا تركته يهرب غير يخطط لهجمات مستقبلية, بس اذا هرب فكر قبل ما تحاول تلحقه

الصين أيام ما كانت الحرب كفوف

في عام 449 قبل الميلاد ولاية وو احتلت ولاية يو و حبست الدوق جيو جيان لمدة ثلاث سنين قبل ما يرجعوه لمملكته. بس رجع بلش خطة الانتقام. لمدة سبع سنين حكم بالعدل و الحكمة تنو انعمت قمار الشعب فيه. و مستعدين يفدوه بالروح بالدم. جهز جيشه و هجم على وو و مردغهم. ملك وو هرب و كانت مسألة وقت تينمسك. بعث أكم سفير لجيو جيان طالب منه الرحمة. ذكروه كيف لما وو مسكوه و كانوا بقدروا يخلصوا عليه بس أطلقوا سراحه, و هسا ملك وو بطلب رد الجميل. جيو جيان قعد يفكر بالسولافة لما رئيس الوزراء فان لي تدخل و قال “لما السما أعطت دوق وو فرصة عظيمة عشان يصير قوي ما أخذها و هسا هيو ميكل خرا. اذا انت كمان ما اخذت الفرصة الي بإيدك, بالأخير غير تنكحش من ولايتك و كل تعبك بروح عالفاضي و بتوكل خرا انت كمان” الدوق اقتنع و رد السفير مع رسالة إنه مش رح يرحمه. لما ملك وو وصلته الرسالة فقد الأمل و انتحر

5. رافق عدو بعيد عشان تشمط عدو قريب

المعروف إنه الدول الي بتحد بعضها بتصير ألد الأعداء بينما البعاد عن بعض بكونوا أفضل حلفاء. لما تكون أقوى واحد بالميدان, أكبر خطر عليك هو ثاني أكبر خطر بنفس الميدان, مش أكبر خطر بميدان ثاني

الصين أيام سلالة هان

في عام 110 ميلادي محافظة هونان اتبهدلت من المجاعات و الفيضانات, المحصول كان زفت و الناس قرقدت من الجوع. الحكومة الفاسدة خلت الأمور أسوأ و بالأخير قلبت المحافظة ميمعة. الزعران و السرسرية الي كانوا يسرقوا و يقطعوا الطريق عأطراف المدينة منعوا أي أمل بمساعدة من برا. رئيس البلدية, يو-هو تعين و انعطى كامل الصلاحيات عشان يزبط الأمور. أعلن إنه بده يعمل قوة عسكرية و بده متطوعين. أولا أعلن إعفاء عام لأي واحد بشارك. و أعلن إنه بدور على ثلاث فئات. الفئة الأولى فئة الناس الي سرقوا و قتلوا, عشان يعملهم قادة و يعطيهم أعلى رواتب, بعديها فئة السراقين بس, و بوخذوا ثاني أعلى رواتب, و الفئة الثالثة الي بس كانوا مشاركين مع العصابات عشنهم مكسلين و بدهمش يشتغلوا شغل حقيقي. و غير يعطيهم أقل رواتب. بأكم اسبوع صار عنده حركة 300 مجند. أعطاهم أسلحة و زي عسكري و خلاهم يصفوا قدامه و خاطبهم “الي فات مات و عفا الله عما مضى, بس لازم تكفروا عن ذنوبكم بحق المجتمع. عشان هيك روحوا و اقتلوا السرسرية الي ما اجوش يتطوعوا للجيش” و ما كذبوا خبر و خلال سنة فرطت كل العصابات و صارت الضاحية آمنة

6. استعير الشارع لتحتل جيو

استعير أغراض من حليف لتهجم على عدو مشترك. بس تغلب العدو, استخدم الموارد لتقلب على الحليف نفسه الي اعطاك الأغراض

الصين أيامات الخريف و الربيع

ولايتي يو و جيو الصغار كانوا جيران لولاية جن الكبيرة. دوق زيان في جن كان بده يحتل الولايتين. و كانوا عارفين و مستعدين يحموا حالهم. جنرال الدوق, زون زي اقترح إنهم يلفوا ليباغتوا جيو عن طريق يو, و اقترح إنهم يستغلوا دوق يو لأنه طماع و ممكن ينرشى بهدايا يشب و أحصنة مقابل يمرق الجيش من عنده. الدوق اعترض إنه يعطي كل هالكنز “بلكي أخذ الهدايا بس ما اعطاناش الطريق؟” الجنرال زون رد “اذا بدوش يمرقنا مش رح يقبل الهدايا, و اذا مرقنا, اعتبر الي معطينه اياه كأنا مؤقتا حاطينه بخزنته بدل خزنتنا

بس الرشوة وصلت دوق يو, واحد من مستشارينه, جونج زيكي حذره و حكاله “يو لجيو زي الشفة للسنان. بقى أجدادنا يقولوا “إذا راحت الشفة, طقطقن السنان من البرد” جيو بتقدر توقف معتمدة على يو و يو بتقدر تمشي حالها معتمدة على جيو. إذا فتحنا طريق لجن, غير ييجي يوم نشوف جيو بتضيع بالصبح, و يو بتلحقها بالمسا. لويش بدنا نخلي جن تمر؟” دوق يو ركب راسه و ما أخذش بالنصيحة, أعطى طريق لجن و بعد ما احتلوا جيو, رجعوا و احتلوا يو. جنرال زون أخذ الأحصنة و الأحجار الكريمة و رجع للدوق. الدوق زيان ازبهل و نهّف “اليشب لساته نظيف بس الأحصنة طلعلها أكم سن زيادة

مش معروف مين جمع أو كتب الاستراتيجيات الصينية هظول, و لكنها أساس كثير من خدع معروفة حاليا. كتاب فن الحرب فيه سوالف عن الحرب, هاي الاستراتيجيات ممكن تستخدمها بحياتك العادية.  النسخة  بالانجليزي الي ترجمتها هان و في ترجمة بالعربي لأغلب الاستراتيجيات هان. في الترجمة لأول 12 استراتيجية واجهت تعبير ما عرفت ايش معناه و و كتبت جنبه, المهم كل ست حالات بتلاقي حالك فيها الها ست استراتيجيات, الي هون هم أول حالتين يعني أول ستتين, و ان شاء الله أكمل الاستراتيجيات كلهم قريبا. الاسماء بتعجق بس العبر منها واضحة حتى لو شلفقتها

إنجوي

ثاني ثنعش هان

ثالث ثنعش هان

استراتيجيات لما يكون وضعك لوز

1. خورف الامبراطور عشان تقطع البحر

النسنسة في العتمة و الظل, و القعدة في الخرابة أو إنك تتخبى ورا برداية كلها سوالف بتخلي الناس يشكوا و يسألوا “مال عرضه؟”. إذا بدك تخورف أي واحد, لازم تخبي نيتك العاطلة ورا تصرفاتك الطبيعية جداً

خريفية يابانية

مرة كان في فار ضخم و حدق مقزز ساموراي, الساموراي عاف حاله و راح عالقرية يشتري بسة. لقى بياع و حكاله كيت كيت و البياع حكاله في عنده بسة اخت شلن, و كان شكلها مرتب و متكتك. الساموراي روح معاه البسة بس الفار طلع أسرع و بعد اسبوع الساموراي رجع عالبياع, البياع أعطاه بسة دواوين, كبيرة و مشطبة و حلف يمين إنه هالمرة مش رح يقدر الفار يعمل اشي. الفار الحدق ما لعب قدام البسة و كان يضل يلبد نص اليوم, بس لما تنام كان يطلع و يركض بالدار و يقزز الساموراي بالنص الثاني من اليوم, رجع عالبياع و البياع هز راسه و حكاله أكثر من هيك ما عندوش. الساموراي بالصدفة شاف شيخ و حكاله إيدي بزنارك لاقيلنا حل لأخت هالفار. الشيخ جابله بس ختيار و ناصح عايش بالمعبد, لدرجة إنه البس شكله ما انتبه إنه الساموراي شايله و ماخذه عالدار. لاسبوعين ضل البس نايم و مش عامل اشي, الفار أخذ عالجو و مش بس صار يقزز الساموراي زي زمان, صار يقرب عالبس و يمز و يرقص, و بعد أكم يوم و هو بتكزدر البس شمطه كف و كرفته عالأرض و مات الفار دغري

2. حاصر وي لتنقذ زاو

لما يكون العدو أقوى من إنك تدق فيه مباشرة, اهجم على اشي بعز عليه. ترى فش حدا قوي بكل اشي, إلا ما في خزق بالدرع, أو نقطة ضعف تقرصه فيها

الصين أيام ما كانت الحرب شلاليط

هاي الاستراتيجية اجا اسمها من حادثة مشهورة صارت سنة 354 أو 355..لا يا ربي اتوقع 354 قبل الميلاد.. المهم بقى في واحد من أشهر الاستراتيجيين في الصين اسمه سن بِن (من احفاد سن زي الي كان مشهور من يومها حتى), و بقى المستشار لملك كي. سن قبل هيك كاين شغال في وي بس وزير ثاني اسمه بانج جوان صار يغار من ذكاؤه, و بلش يحفرله تنو أسفنه و حكموا عليه إنه خاين و لازم يتشوه و ينسجن. سن قال يا روح ما بعدك روح, شلف و راح على كي. بعد اكم سنة ملك وي عمل بانج جوان رئيس الجيش و وداه يحتل عاصمة زاو. ملك زاو طلب من ملك كي يفزعله. ملك كي استشار و كلهم قالوا لازم يروحوا دغري يساعدوه, سن بِن كان رأيه العكس. و قال “إنك تخش بين جيشين زي تحاول توقف موجة بإنك توقف قدامها. الأحسن نصبر ليتعبوا حالهم” الملك عجبته الفكرة و ما هجمش

الحصار طول أكثر من سنة تنو سن بِن قرر إنه الوقت جاهز ليساعدوا زاو. ملك كي عين الأمير تيان جي جنرال و سن مستشار عسكري. تيان جي كان بده يهاجم قوات وي دغري ليرفع الحصار, سن حكاله “أغلب جنود وي مشغولين بالحصار, دفاع لِمدينة بكون زخخرا. إذا هجمنا على عاصمة وي منجبر الجيش يرجع يدافع و هيك مننقذ زاو و مندمر قوات وي بنفس الوقت” تيان جي ما كذّب خبر و قسم جيشه قسمين, جزء دق بالعاصمة و الثاني لبد لجيش وي و هو راجع

بس الجنرال بانج جوان سمع إنه العاصمة مهجوم عليها, حمل حاله و الجيش و رجع. طبعا الجنود تعبانين و عايفين حالهم من حصار سنة و نقلة فُجائية, بس رجعوا تعبطوا الفخ و خسروا بلاوي. و هكذا انقذوا زاو و بانج جوان يا دوب وصل للعاصمة ليلملم خسارته. بعد فترة سن بِن طقعه باستراتيجية كلاسيكية ثانية

3. اقتل بسيف مش إلك

لما ما تقدرش تهجم عالواحد دغري, اهجم بقوة واحد ثاني. اخدع حليف ليهجم عليه, ارشي مسؤول ليقلب, أو استخدم قوة العدو ضد حاله

الصين أيام ما كانت الحرب شلاليت

تشانج تو انشق من زوو الغربية و راح على زوو الشرقية, و قرلهم بكل الأسرار. زوو الشرقية زهزهت و زوو الغربية انبعض كيفهم. الوزير فينج تشو قال لملك زوو الغربية “هاتلك قرشين ذهب و بقتلك إياه”. الملك وافق و اعطاه الي فيه النصيب, اليوم الي بعده فينج تشو ودا عميل لزوو الشرقية معاه المصاري و رسالة لتشانج تو نصها “تذكير لتشانج تو إنك لازم تكمل المهمة بأسرع وقت بلاش يزقطوك و يشحروك إذا طولت”. و قبل ما يطلع العميل كاين فينج تشو باعث عميل ثاني للحدود عشان يبلغ إنه في جاسوس جاي بالليل. بس أجا العميل الأول فتشوه و لقوا المصاري و الرسالة و ودوهم للمسؤولين. بعد فترة انعدم تشانج تو

4. استنا العدو العايف حاله على راحتك

الأفضلية بتكون إلك إذا اخترت مكان و وقت المعركة. بهاي الطريقة بتعرف كل اشي و عدوك زي اللاطة. اجبر خصمك يصرف طاقته على حكي فاظي و انت حافظ على طاقتك. بس يتعب و ينلخم خش عليه بالزاكي

خريفية صينية

زوان امبراطور زوو كان يحب يراهن على هوش الديكة و كان عنده خم فيه دياك مدربة. و مع إنهم قويين بس دايما بتطقعوا من دياك مدربهم جي زينج زي. فشغله عنده ليدربهم

بعد عشر أيام الامبراطور سأل إذا انهم جاهزين . “لسا” قال جي “كثير أقويا و شادين عحالهم, و بنطوا على أقل صوت” أُخرى عشرتيام قاله الامبراطور “هاه شو صار؟” رد “لسا, بعدهم منرفزين و بنطوا على أي اشي بتحرك” كمان عشر أيام رجع سأله و رد “برضو لسا, بطلوا يدقوا بسرعة بس بتهوالهم بقشرة و بظلوا يجحروا و يشدوا عحالهم من أخف استفزاز” بعد عشر أيام سأله و رد “أيوا, مع إنه شوي بفعفطوا أكم مرة, بس وقفتهم صح. من بعيد ببينوا مصنوعين من خشب. قدامهم أي خز مش رح يفكر يدق فيهم و أكيد غير يشلف

5. انهب الدار المحروقة

بس الدولة تكون مفكفكة من جوا, بس ينتشر المرض و الجوع, و الفساد و الجرائم تننشر بتبطل تقدر تدافع عن حالها, هاظ أفضل وقت لتهجم

صين أيام ما كانت الحرب بوكسات

كي و هان بقوا حلفاء لما تشانج يي هجم على هان بقوات من كين و وي. هان طلبوا مساعدة من كي, ملك كي قال “هان حليفتنا و بما إنه كين هجم عليها لازم نساعدها” بس وزيره تيان تشين سو ما وافق و قال “جلالتك شوي مخربط بالتخطيط. لازم توافق إنك تساعدهم بس ما تودي اشي غاد. هسا مملكة يان ماكلة هوا, الملك سلم العرش لرئيس الوزرا الي ما حداش طايقه. النبلاء و العوام ما عجبهم. إذا كين هجمت على هان, تشو و تشاو رح يساعدوها و هيك كأنه الجنة بتهدينا يان عطبق من ذهب

الملك وافق و وعد هان بمساعدة, بس كين هجمت على هان, تشو و تشاو راحوا يساعدوا زي ما هو متوقع. لما كل الممالك الكبيرة انشغلوا بحرب هان, كي عالسكيتي خشوا على يان, و بظرف ثلاثين يوم احتلوها

6. طقطق بالشمال و اذرب باليمين

بأي معركة الحركات الفوجائية بتعطيك افضلية اخت شلن. حتى لما تواجه العدو وجه لوجه, المفاجأة بتنعمل لما تهجم على أقل مكان متوقعه. عشان هيك لازم تعمل حركة عشان تصنع بخياله توقع معين

الصين أيام سلالة سونج

مرة كان في مسؤول منقول جديد عالعاصمة. المحل الي نزل فيه كان فيه محل شاي, و على السايد الثاني من الشارع كان في محل ببيع اقمشة مصبوغة و غالية. لما ما كان في اشي يعمله, كان يقعد عالشارع و يصفن بالناس. مرة انتبه إنه في ناس مشبوهين بلفوا و بدوروا حولين محل الأقمشة و براقبوه. واحد أجا عليه و حكاله “احنا حرامية و جايين نسرق هالأكم قماشة, بما إنك كمسرتنا يا ريت ما تسولفش اشي”, رد عليه “احنا ملناش دخل, لويش بدي أسولف يعني؟”. الحرامي شكره و راح. المسؤول فكر “هالمحل عارض اغراضه قدام الكل بنص النهار, إذا الحرامية قدروا يسرقوه عفارم عليهم” و ضل يراقب كيف بدهم يعملوها. الناس نفسهم بس راحوا و رجعوا, مرات يلتموا عيمين المحل, مرات عشمال المحل. المسؤول ظل قاااعدد لحتى سكر المحل “متيسهم” قال لحاله “شكله كانوا يمزوا علي”. بس رجع على غرفته عشان يطلب أكل ما لقى اشي فيها

استراتيجيات وقت المواجهة

1. اعمل اشي من ولا شي

لما تعمل حالك بدك تشمط واحد كف مرة مرتين, غير يزيح, بس لما يشوف إنك بتمز بتردد يزيح ثالث مرة, وقتها اشمطه الكف فعلا و امزع حنكه

الصين أيام سلالة تانج (مش العصير

أيام ثورة آن لوشان بسنة 756 بعد الميلاد, جنرال تانج تشانج شون كان متحاصر من قوات الجنرال لينجو تشاو. و كان لكل عشرين جندي برا مقابلهم بس واحد جوا. و عالسريع أسهمهم خلصت. عشان يزبط وضعه الجنرال تشانج حكى لزلمه يعملوا زي فزاعات قش و يلبسهم أسود. بالليل نزلهم بحبال عن السور و دق طبول و أجراس الحرب. جنرال لينجو فكر إنها هجمة مفاجئة بالليل و أمر جنوده يحمموا الحيطان بأسهم. بس امتلوا الفزاعات بالقش سحبوهم و هيك دبروا أسهم للمعركة

ثاني يوم الجنرال لينجو اكتشف إنه تخورف و هجم عشانه انذل. بالليل تانج كمان مرة نزل القش بس لينجو طلب من جنوده ما يهجموا, بس تشانج شاف إنه ما هجموش, بعث خمسمية من أحسن الجنود الي عنده. و دخلوا عليهم بنص الليل و بهدلوهم. الحصار انرفع و الجنرال لينجو شلف

2. قدام الناس صلح الطريق, و بالسر خش على تشينسانج

اهجم على العدو بجيشين. الأول هجمته مباشرة و واضحة عشان العدو يستعدلها. الثانية مش مباشرة و لئيمة مستحيل يتوقعها, هيك بآخر لحظة بحاول يقسم جنوده و بنلخموا

اليابان في فترة موروماتشي

بسنة 1560 كان أودا نوبوناجا -من أشهر الزعماء العسكريين- لساته جديد, و راح بجيش من 2000 جندي ليوقف ضد زعيم عسكري ثاني اسمه اماجاوا يوشيموتو. مع إنه نوبوناجا لكل جندي اله كان في اثنعش مع عدوه, طلع و هو يدندن ولا فارقة معاه. المستكشفين تبعونه ردوله خبر إنه إماجاوا كين بريح في قرية قريبة من وادي ظيق نوبوناجا كان عارف إنه ممتاز لهجمة مباغتة

و المستكشفين كمان حكوله إنه جنود إماجاوا كانوا بحتفلوا و شايلين روس مقطعينها من المعركة الي قبل. نوبوناجا عمل الخطة كالآتي. نصب مخيم قريب شوي عالقرية و عليه علام و فيه رجال قش عشان يبين إنه كتيبة كبيرة أجت. جنود إماجاوا توقعوا الهجمة من غاد. بس نوبوناجا و جنوده لفوا لفة طويلة عشان يطلعولهم من ورا, و الجو وقف معاه و كبست شتا. عشان يستغل الجو هجم من ورا فجأة, من كثر ما كانت مش متوقعة, إماجاوا فكرها بس هوشة بين جنوده, و بس راح يشوف استوعب إنه في هجمة و كان في اثنين ساموراي راكضين عليه. راسه انقطع و جنوده فرطوا و بأكم دقيقة كانت الأمور خالصة. هاي المعركة بلشت معها شهرة أودا نوبوناجا و بسرعة صار و تصور و هسا معروف واحد من أقوى الزعماء العسكريين في اليابان

3. راقب النار عالضفة الثانية

وفر دخولك للمعركة لحتى ما كل الثانيين يتعبوا حالهم, بعدين خش عليهم بالزاكي و خذ الي فيه النصيب

اليابان وقت زعامة هوجو

في 1583 الجنرال العظيم تويوتومي هيديوشي كاين يمركز جنوده ضد آكشي ميتسوهايد في معركة صار اسمها يامازاكي. بعد ما بلشت المعركة بنتفة, تسيتسوي جانكيان, حليف ميتسوهايد وصل. انبهر بجنود هيديوشي من كثرهم, و ما هجم دغري, و أمر جنوده يصفوا على هضبة فوق هورا-جا-توجي عشان يراقب المعركة و يشوف مين هيفوز ليوقف معاه. بس شاف هيديوشي مسيطر على الوضع خان حليفه و بعث جنوده يحاربوا مع هيديوشي. السولافة هاي منتستش و صارت بالياباني جملة “تستنا بهورا-جا-توجي” زي “تراقب النار..” (مش ملاقي معنى “تراقب النار

4. خبي الشبرية ورا ابتسامة

دهلز و اضرب صحبة مع عدوك, بس يثق فيك أسفنه

الصين أيام ما كانت الحرب مناطحة

ملك وي ودا مزة هدية لملك تشو, و طيرت ضبان عقله. مرته, الملكة زينج زيو, عارفة قديش مكيف على المزة. عاملتها زي الاخت, و اعطتها هدايا و مصاري و اي اشي بتطلبه. الملك بس سمع هيك قال لملكته “المرة بتخدم الزلمة بجمالها و الغيرة جزء من طبيعتها, بس انت عشنك عارفة قديش هالمرة بتبسطني, عزيتيها أكثر مني. مستحيل في أي ملكة زي هيك مع زوجها” الملكة عرفت إنه الملك مش شاك فيها إنها غيرانة, راحت قالت للمزة إنه “الملك بحب جمالك بس مش كثير عاجبه منخارك. المرة الجاي بس تكوني معاه غطيه بإيديك” المزة انبسطت عالنصيحة و عملت زي ما قالتلها

الملك اشتكى لمرته “هالبنت بتظل تغطي خشمها و هي معي, بتعرفي لويش؟”, قالت “اه”, سألها “ايش؟ ما تخبي علي شو ما كان السبب”, ردت “يا جلالتك شكلها ما بتحب ريحتك”. “القحبة!” رد الملك, و أمر إنهم يقطعوا أنف البنت الحزيطة

5. ضحي بشجرة البرقوق عشان الخوخة

بعظ الأحيان لازم تظحي بهدف قصير المدى عشان هدف طويل المدى. استراتيجية التظحية هاي يعني تحط واحد ببوز المدفع

الصين أيام صقور الأرض

في وحدة من هجماته تساو تساو نقص الأكل عليه. سأل الضابط تبع المواد شو يعمل. الضابط اقترح إنهم بالسر يصغروا القمع الي بصبوا فيه الأكل. تساو تساو كيّف و حكاله يعتمد. بعد أكم يوم الجنود بلشوا يتشكونوا و اتهموا زعيمهم بإنه بغشهم, تساو تساو قال للضابط الموضوع واحد اثنين, الضابط قال “سيدي مستعد اعمل أي اشي, شو بتؤمر؟”. رد عليه تساو تساو “اغلبك بدي استعير راسك”, و قطع راسه و حطه على عمود طويل و عليه لافتة “انزقط و هو بغش بالمونة باستخدام قمع اصغر

6. اغتنم الفرصة لتسرق الغنمة

بس تمشي على خطة ما توفر أي فرصة تستفيد منها شو ما كانت, و ما تضيع عحالك أي ربح ايش ما كان يكون

الصين أيام سلالة يوان

في الأيام الأخيرة لسلالة يوان, بقى بي ثورة بالامبراطورية كلها. أوليتها كان في عدة أطراف بحاولوا يستلموا الأمور بعد السقوط الحتمي لآل يوان, بس بالأخير الميدان صفى لاثنين: تشو يوان-تشانغ و تشين ييفو. الجيشين التقوا ببحيرة بويانج عشان هوشة بحرية. الجنرال تشين كان اله الأفضلية بالجنود و السفن. سفنه كانوا كبار و فخمين و صفهم جنب بعض, و وصل بينهم بسلاسل عشان يعمل حاجز صعب اختراقه. الجنرال تشو بعث سفنه بس تدمروا. بس من حسن حظ تشو باليوم الثاني هبت ريح شمالية غربية, و كان اسطول تشين باتجاه الريح مصفوف,تشو استغل الفرصة و بعث قوارب مولعة لتولع بالحاجز. جنود تشين انعجقوا بالنار و العاصفة, النار هبت و الريح هشت و نشت. تشو استغل العجقة و هجم بأسطوله و دمر قوات تشين. سهم خزق عين الجنرال تشين و تشو صار المؤسس لسلالة مينج